Tehzeeb ki Qirat تہذیب کی قرات

Description

احمد جاوید صاحب ہمارےوقت کا ایک نادر علمی وجود اور یگانہ روزگار شخصیت ہیں۔ اپنے موضوعات کے تنوع،فکر کی گہرائی و گیرائی، ندرتِ بیان، اظہارکے اسلوب، ذہن کی خُلّاقی، طبعیت کی درویشی اور بے مثل اخلاص کیشی جیسے عوامل کے معجزانہ امتزاج نے انہیں یہ مقام عطا کیا ہے۔ جاوید صاحب کی شخصیت، تیزی سے گم ہوتی ہماری فکر و تہذیب کی ایک کڑی ہے جو اپنے عصر سے ہم آہنگ اور روایت میں گڑی ہے۔
جاوید صاحب کئی برسوں سے مجالس اور سماجی میڈیا کے ذریعہ اپنی فکر کا چراغ جلائے ہوئے ہیں۔ یہ اقبال کے نالہ نیم شب کا نیازہے یا سلیم احمد کے چراغ نیم شب کا اعجاز، مگر تہذیب و روایت کے عشاق کے لئےشاید امید کی واحد کرن۔ وہ ہماری فکری بازیافت کی توانا اور وقیع آواز ہیں ۔ ایسی درد مند شخصیت جو بنا کسی معذرت خواہی اور عذر خواہی کے نشتر زن ہوتی ہے اور نعرہ زن بھی، نوحہ خواں ہوتی ہے اور رجز کناں بھی ۔ اپنی اقدار، روایت اور تہذیب سے محبت کرنے والے اب تو خال خال بھی نظر نہیں آتے۔
گزشتگانِ محبت کے خواب لکھنے کو
ابھی تو میں ہوں مگر، بعد ازاں کوئی نہیں ہے
———-
احمد جاوید صاحب کا علمی کام بوجوہ، تحریری کم اورجدید صوتی و بصری ذرائع ابلاغ کے توسط سے زیادہ رہا۔ حرف مطبوعہ کی وقعت اور اہمیت کے پیش نظر کتابی شکل میں اس مواد کی کمی نہ صرف روایتی قاری کا مطالبہ رہی بلکہ اہل علم کا تقاضہ بھی۔ زیر نظر کتاب کی تدوین و ترتیب کے بعد جاوید صاحب کی نظر ثانی اور مشوروں سے ایک ایسا گراں مایہ علمی مواد فراہم ہوگیا ہے جو بجا طورپہ وقت کی ضرورت ہے۔
یقیناََ “تہذیب کی قرات” کے ذریعہ احمد جاوید صاحب کے افکار و تجزیات کا، ناظرین و سامعین سے نکل کر قارئین تک پہنچنے کا عمل طلبہ، اساتذہ اور کتاب سے محبت کرنے والوں کے لئے خوش کن ہوگا۔